GUIDA STILÌSTICA PÛ SICILIANU NNI PANZAREḌḌA.COM
‘N quali sicilianu avìssimu a scrìviri?
Cca a Panzareḍḍa avemu du’ punti chiavi ncapu â scrittura:
-
Ognidunu scrivi nnâ so propria parrata
-
Scrivemu nnâ na manera cumprenzìbbili a tutti i parranti dû sicilianu.
Sunnu du’ ubbittivi ca si contraddìcinu, no? Pirò nun è un prubblema si scrivemu ‘n un sicilianu “nadaru”, unni pruvamu a usari furmi e palori ca quasi tutti i sicilianu già sannu. Allura, unu di Mòdica nun scrivissi “mi ciamu”, ma “mi chiamu”, pirò quannu ànn’a scartari na furma pû verbu “vèniri”, ponnu scartari “vèninu” mmeci di “vennu”. Cca ti poi dumannari “comu avissi a capiri zoccu cumprinzìbbili ad autri siciliani è, e zoccu è troppu “riggiunali”? Pi chissu, avemu a nostra guida stilìstica pi t’ajutari. Si na cosa è picca chiara, o ài na dumanna ncapu na cosa cu nun discurremu cca, scrìvini na mail!
Beḍḍu è quannu ni lassamu pigghiari dâ fantasìa e ni strumintamu pi scrìviri un cuntu, un libbru o zoccu è-è... ma macari cchiù beḍḍu è s'arriniscemu a aviri ùrdini ntra tutti li opri. Chistu è pussìbbili si sicutamu règuli pricisi e na grafìa uguali pi tutti.
Fìcimu sta guida stilìstica pi schicari comu scrìviri nta na manera pulita e sapurita pi cu' leggi; certi su' règuli, autri su' sulu cunzigghi: a picca a picca ora li videmu tutti
RÈGULI
Règula ginirali
-Littri e grafìa
1) GGH:
Certi palori comu "megghiu", "travagghiu", "pigghiari" nnô tempu vìttiru tanti grafìi diversi pi stu sonu ca ànnu 'n menzu: GGHJ, GGJ, GLI; l'unica ca accittamu, pirò è GGH. Scrìviri "megghju", "meggju" o "megliu" nun è bonu, puru si cu' scrivi veni di na banna unni a prununzia è vicina a chiḍḍa taliana (pruv. di AG e CL)
2) J:
Sta littra, ca 'n italianu quasi nun esisti cchiù, nnâ nostra grafìa è assai cumuni -Serbi quannu cc'è na I ntra du' vucali: ajutu, majuri, ajeri (no aiutu, maiuri, aieri)
-Serbi quannu, a l'accuminciu di palora, cc'è na I cu na vucali ca a sicuta: jùnciri, jusu, jornu (no iùnciri, iusu, iornu)
-A littra G, a tanti banni speci dâ Sicilia livantina, addiventa na J. Sta furma è bona e accittata. "Gaḍḍu", "pagari", "gatta" addivèntanu "jaḍḍu", "pajari", "jatta"
-Nnê digrammi IJ/JI serbi pi nzingalijari na littra ca cadìu prima o doppu di na I, e s'àv'a scrìviri: pajisi, disiju, siḍḍiju (no paisi, disìu, siḍḍìu). Si ti veni un dubbiu ncapu a IJ/JI po taliari sta lista ca fìcimu cu tutti i palori cchiù cumuni: [jùnciri lijami]
3) H:
Nun è na littra cumuni assai, ma l'attruvamu quarchi vota
-Serbi pi nzingalijari a prununza dura (occlusiva palatale/velare, addipenni dû dialettu) di C e G: cheppa, schicari, sghicciari, ghiacciu
-Serbi pi scrìviri un sonu particulari ca attruvamu nni quarchi dialettu speci nnê pruvinci di Tràpani, Girgenti e Nissa, nni palori comu "hama", "haninu", "abbrahatu"
-Vidi sutta a "Verbu aviri"
-Vidi sutta a "CI vs SC vs HI"
4) CI vs SCI vs HI
-'N sicilianu, a "fricativa postalveolare sorda" [ʃ] (comu nnô talianu "scena" o nnô ngrisi "ship"), po aviri na prununzia duppia o sìngula. Si scrivi SCI sulu quannu è duppia: "sciarra", "pisci", "sceccu"; mentri "cucinu", "staciuni", "duci" si prununzia sìngula. Mai "cuscinu", "stasciuni", "dusci"
-Certi palori ca vennu dû digramma latinu FL ("ciuri", "ciumi", "cionna" ecc) ponnu aviri na prununzia comu chiḍḍa ca dìssimu cca ncapu, una para para ô talianu "cena" e una spirata. A règula di prima ancora vali: quannu u sonu è sìngulu si usa sulu a C ("ciuri", "ciumi", "cionna"), quannu è duppiu si metti macari a S ("asciari", "ciusciari", "ciuscialoru"). Pâ prununza spirata, bastanti cumuni ntra li dialetti siciliani di quasi tutti i pruvinci, putemu usari a littra H ("hiuri, "hiumi", "hiuhhiari"). Cumunca, è sempri megghiu usari (S)CI
5) Vucali E & O
-Si ponnu usari â fini di na palora sulu si ḍḍocu l'accentu ci cadi, comu nni "tinchitè" o "burò". Palori comu "gaḍḍine" o "travagghio" nun cci ponnu èssiri
-Puru a menzu di na palora, si ponnu usari (quasi) sulu si ḍḍocu l'accentu ci cadi: tèniri, corsu, megghiu. Avemu quarchi eccizzioni: mprèstiti ricenti dû talianu e tecnicìsimi ("etimuluggìa", "esempiu", "elèttricu") e palori cumpòsiti ("scornabbeccu", "trentanovi", "sperciagaja")
-Certi dialetti ànnu un finòminu, ntisu "mitafunìa", ca junci na semi-cunzunanti prima di E e O. Stu finòminu nun si scrivi: "pedi", "cosa", "menzu"; no "piedi", "cuosa", "mienzu"
6) ḌḌ
-Sti littri sèrbinu pi scrìviri ḍḍu sonu cacuminali assai carattirìsticu dâ lingua siciliana: "occlusiva retroflessa sonora" [ɖɖ]. Autri varianti gràfichi (DDH, DDR, LL, ĐĐ) nun si ponnu usari. "Beḍḍu", mai "beddhu", "beddru", "bellu", beđđu"). P'aviri sta littra nnâ tastera: [jùnciri lijami]
7) Rutacìsimu
-È un finòminu assai cumuni ntra tanti dialetti dâ lingua siciliana, unni a littra D pigghia a prununzia dâ R quannu è sìngula e s'attrova ntra du' vucali. Nun si scrivi mai. "Pedi", "diri", "caudu" e mai "peri", "riri", "cauru"
8) Assimilazzioni & gruppi mpussìbbili
È un finòminu, cumuni assai assai 'n sicilianu, ca cc'è quannu na cunzunanti s'assuppa na certa carattarìstica dâ littra ca cc'è prima o doppu d'iḍḍa
-Assimilazzioni dâ R: nta na beḍḍa feḍḍa di dialetti, quannu cc'è na R prima di na cunzunanti, chista addiventa uguali â littra di doppu o nesci comu na I. St'assimilazzioni nun si scrivi. "Parcu", no "paccu" o "paiccu"; "furnu", no "funnu" o "fuinnu"
-Sunurizzazzioni: nnâ majurìa dî dialetti, i cunzunanti doppu N o M si pìgghianu a sunurità dî nasali, ma abbisogna sempri di scrìviri a cunzunanti surdi:
--"puntu", no "pundu";
--"ntrallazzu", no "ndrallazzu";
--"canciari", no "cangiari";
--"lavanca", no "lavanga" (vidi sutta a "NG");
--"nfami", no "nfami";
--"nquatrari", no "nguatrari"
--"jìnchiri", no "jìnghiri"
--"campu", no "cambu"
-Assimilazzioni di MB e ND: sti dui su' gruppi mpussìbbili. B e D si jùncinu chî nasali, e l'assimilazzioni si scrivi. "Bumma", no "bumba"; "unni", no "undi"
-RV e SV: macari chisti su' gruppi mpussìbbili, e a V addiventa na B. "Corbu", no "corvu"; "sbampari", no "svampari"
9) NG
È un gruppu di cunzunanti particulari. 'N sicilianu esisti un sonu, a "nasale velare" [ŋŋ] ca nnâ nostra grafìa si scrivi NG, mai ṄṄ, NĠ, ƔƔ o autru. "Fangu", no "faṅṅu", "fanġu", o "faɣɣu". È mpurtanti ca nuḍḍu cunfunni stu sonu cu NC câ sunurizzazzioni! Si ti veni un dubbiu ncapu a chistu, po' taliari sta lista ca fìcimu cu tutti i palori cchiù cumuni cu NG: [jùnciri lijami]
10) Cunzunanti duppi
-B, GI (gi duci), Z si scrìvinu sempri duppi quannu su' ntra du' vucali o doppu di na vucali e prima di L/R: zibbibbu, libbru, pùbblicu, pruggettu, pizzu, zizzu. A autri banni 'un serbi: arba, bunaca, sbiu, margiu, gileccu, zitu, zammù, menzu, forza
-ḌḌ camìnanu sempri accucchiati: iḍḍu, ḍḍocu
-Serbi di scrìviri i duppi a l'accuminciu sulu quannu esisti macari a virsiuni sìngula. Pi scempru: esìstinu sia palori cu na M a sulu (mari) ca cu du' MM (mmidia).
--naca/nnicari;
--ghiacciu/gghiùmmaru;
--casa/cca;
--celu/cci;
-A littra V po èssiri duppia sulu 'n quarchi mprèstitu talianu ricenti ("avverbiu"), masinnò addiventa BB ("abbucatu")
Signi gràfici:
1) Accenti gravi:
-Si ponnu usari sulu l'accenti gravi (cità, tèniri, ìsula, basilicò, nùmmaru), mai chiḍḍi acuti (citá, téniri, ísula, basilicó, númmaru)
-L'accenti si scrìvinu sulu quannu càdinu nta na sìllabba diversa dâ pinùrtima (zàccanu, accàttitu, mità, àrbulu...). Nun sèrbinu nni palori comu "porta", "cantari" e "curaḍḍu"
-Si scrìvinu pi nzingalijari na I ca è vucali e no semi-cunzunanti (talìu, Marìa, fissarìa)
-a pripusizzioni “cca” si scrivi senza accentu. Pirò, “ḍḍà” si scrivi pi l’accentu pi fari a distinzzioni ntra a pripusizzioni, e l’articulu addimustrativu “ḍḍa”. A scempru, “ḍḍa gatta è ḍḍabbanna”.
2) Accenti circunflessi:
-S'ùsanu quannu du' vucali si jùncinu, speci nnê pripusizzioni:
--di la casa= dâ casa;
--pi lu veru= pû veru;
--nta la manu= ntâ manu;
--nna lu celu= nnô celu;
--a li voti= ê voti;
--mi lu dissi= mû dissi;
--ti la dugnu= tâ dugnu;
--si li cantau= sî cantau;
--àju a fari= hê fari;
--àvi a diri= hâ diri
-Autri varianti nun sunnu accittati mai (d'a casa, p''u veru, ntà manu, nnoo celu...)
-Si ponnu usari, speci nnê cunti o diàlughi dialittali, pi certi furmi cuntratti:
--autru= âtru
--avissi= âssi
3) L'apòstrufi
-S'usanu sulu pi nzingalijari na littra o na sìllabba ca cadi:
--nun= 'un
--cui= cu'
--poi= po'
--quantu è= quant'è
--si àvi a fari= s'àv'a fari
--accattari= 'ccattari
-Nun sèrbinu mai prima di na palora ca accumincia cu du' o tri cunzunanti: mmrogghiu e no 'mmrogghiu; ngattari e no 'ngattari; gnuranti e no 'gnuranti; ntrunatu e no 'ntrunatu, nzitari e no 'nzitari etc
-Nni l'artìculi, sunnu accittati prima di l’artìculi pî parrati unni si ùsanu cchiù assai i furmi cumpleti (lu, la, li e u, a, i), ma nun sunnu nicissari (a casa, u muru, i muschi; ponnu ‘a casa, ‘u muru, ‘i muschi). Cca putemu diri ca l’usu dî furmi “cumpleti” sunnu visti comu cchiù furmali nnê parrati unu nun sî usi ancora, e tutti i siciliani i ponnu usari p’addimustrari un cuntestu cchiù furmali nnâ scrittura.
-VERBI:
1) Verbu ÈSSIRI
-A terza pirsuna singulari si scrivi "È", cu l'accentu gravi. Autri furmi, comu "eni" e "esti" si ponnu usari sulu siḍḍu è un testu ca scrivi un dialettu pricisu unni sti furmi s'ùsanu: pi l'autri cosi è megghiu scanzalli
-A terza pirsuna plurali si scrivi "sunnu" o, p'accurzari, "su'" (cu l'apòstrufu â fini): s'ànn'a scanzari autri furmi comu "sunu" o "sonu" nnô scrittu.
2) Verbu AVIRI
-Nun serbi di mèttiri l'acca ("aju/avi/annu"; no "haju/havi/hannu"). È pussìbbili, pirò usari l'accenti ("àju/àvi/ànnu") quannu unu voli spàrtiri stu verbu chî palori ca si scrìvinu uguali (l'annu ca veni/iḍḍi ànnu na casa). Furmi cu o senza accentu sunnu accittati.
-Serbi di jùnciri n'apòstrufu â fini quannu s'àv'a usari a furma curta: "iḍḍu àvi na casa/iḍḍu à' na casa"
-A littra H torna pirò quannu s'àvi a usari a furma cuntratta di "àju a"/"àvi a" (t'àju a diri na cosa/t'hê diri na cosa; s'àvi a fari sùbbitu/s'hâ fari sùbbitu)
-CRIARI NA FRASI
1) Palori lijati
-I palori ca accumìncianu pi J, ponnu canciari di prununzia quannu la palora di prima finisci cu N. Chistu è un finòminu ca nun si scrivi. "Un jornu", no "ugnornu" o "unghiornu"; "nun jittari", no "ugnittari" o "unghittari"; "San Jàpicu", no "Sagnàpicu" o "Sanghiàpicu"
-I palori ca accumìncianu pi J, ponnu canciari di prununzia quannu la palora di prima finisci cu N. Chistu è un finòminu ca nun si scrivi. "Un vasu" e "un babbaluci", no "ummasu" e "ummabbaluci"; "nun vutari" e "nun babbijari", no "ummutari" e "ummabbijari"; "San Valintinu" e "San Brasi", no "Sammalintinu" e "Sammrasi"
2) Duppiamentu fonusintàtticu
-È un finòminu assai cumuni 'n sicilianu, ca succedi quannu certi palori dùppianu a cunzunanti d'accuminciu dâ palora ca veni doppu: "A mia" si prununzia "a mmia". Stu finòminu nun si scrivi mai: scrìviri "a mmia" o "ammia" è sbagghiatu. I palori ca smùrcanu stu finòminu su':
--a (pripusizzioni): a (m)mia
--à': à' (f)fattu
-cchiù: cchiù (l)ladiu
--e: mani e (p)pedi
--è: è (n)nostru
--fa': fa' (c)cuntu
--fu: fu (c)chistu
--hâ: hâ (d)dittu
--hê: hê (d)iri
--pi: pi (d)diri
--po': si po' (d)diri
--quarchi: quarchi (c)cosa
--su': su' (b)beḍḍi
--tri: tri (c)casi
-I littri J e V, cu duppiamentu, càncianu di prununzia. Stu finòminu nun si scrivi. "Tri jorna", no "tri gghiorna"; "tri vrazza", no "tri bbrazza"
3) Ogni palora àvi u rolu so
-Serbi di ricurdari ca, puru ca nnâ prununzia certi palori pàrinu junciuti, ogni palora àvi u rolu so e s'àv'a scrìviri spartuta
Quarchi scempru, ca parti dî sbagghi cchiù cumuni:
--'N cuscenza, 'n Palermu, 'n menzu etc, no ncuscenza, mpalermu, mmenzu etc;
--Mi nni vaju, no minni vaju
--Ti nn'à' jiri, no tinnagghiri
--Nun è veru, no nunnebberu
4) Pripusizzioni d'ajutu
-Certi avverbi vonnu a pripusizzioni "a", e senza d'iḍḍa nun cci a ponnu fari:
--Appressu A na seggia, no appressu na seggia
--Luntanu A na seggia, no luntanu na seggia
--Ncapu A na seggia, no ncapu na seggia
--Supra A na seggia, no supra na seggia
--Sutta A na seggia, no sutta na seggia
--Vicinu A na seggia, no vicinu na seggia
5) Accura â sintassi
-Puru ca è fàcili ca u talianu ni nfruenza quannu scrivemu 'n sicilianu, abbisogna di ricurdari ca sti du' lingui nun camìnanu sempri uguali. Accura ê frasa, ànn'a èssiri naturali
-Nun s'àv'a spàrtiri mai u verbu cu l'ausiliari. Cosi comu "era assai beḍḍu" nun su' boni, megghiu "assai beḍḍu era" o "era assai beḍḍu"
-Megghiu scanzari i verbi cû prunomu lijatu. "T'avissi a diri", no "avissi a dìriti"
-L'aggittivu camina doppu u nomu, no prima. "Àju na casa nova", no "àju na nova casa"
Diàlughi
Quannu unu scrivi diàlugu, si po scrivi assai diversu dû nadaru.