Chianci Palermu

Chianci Palermu

quannu a la scurata, ncatinazzati li scarrozzi,

s’astùtanu li luci dî putiji,

nuḍḍu nta li quarteri

‘mmenzu â strata

la genti nta li casi ritirata.

Chianci Palermu

quannu ntâ munnizza

senti u lamentu di na criatura

ntôn sacchiteḍḍu ’i plàstica rinchiusa

jittata comu fussi spazzatura.

Chianci Palermu a làcrimi di sangu

quannu nta na vaneḍḍa tu cci trovi

siringhi e muzzicuna ‘i sicaretti

pòvira giuvintù, viti struncati.

E chianci quannu ntôn casulari abbannunatu

cc’è un cristianu mortu ncrapittatu,

e ancora quannu, mputenti e disarmata,

talìi la straggi doppu l’attintatu:

chianci Palermu e chiàncinu li matri

chiàncinu li svinturi addulurati.

Beḍḍa ti fici Diu senza difetti,

vasata di lu suli a tutti l’uri,

li cianchi atturniati di lu mari

tiatri e munumenta senza pari,

oru d’aranci e ciauru di lumìa,

beḍḍa Palermu mia,

tu nun ài curpa

ti vogghiu beni e chianciu appressu a tia.